టీడీఆర్ పోర్టల్‌లో ఆధార్ అథెంటికేషన్.. తెలంగాణ ప్రభుత్వం కీలక నిర్ణయం

తెలంగాణ రాష్ట్రంలో ట్రాన్స్‌ఫరబుల్ డెవలప్‌మెంట్ రైట్స్ (టీడీఆర్) ప్రక్రియను మరింత పారదర్శకంగా, సురక్షితంగా మార్చేందుకు ప్రభుత్వం కీలక నిర్ణయం తీసుకుంది. టీడీఆర్ ఆన్‌లైన్ పోర్టల్‌లో ఆధార్ ఆధారిత అథెంటికేషన్‌ ప్రక్రియను ప్రవేశపెడుతూ పురపాలక, పట్టణాభివృద్ధి శాఖ ఉత్తర్వులు జారీ చేసింది. లావాదేవీలలో జరిగే మోసాలు, నకిలీ రిజిస్ట్రేషన్లు, అనధికారిక లాగిన్‌ల వంటి అక్రమాలకు అడ్డుకట్ట వేయడమే ఈ చర్య ప్రధాన ఉద్దేశం.

నూతన విధానం ప్రకారం, ఆస్తి యజమానులు, బిల్డర్లు, డెవలపర్లు టీడీఆర్ పోర్టల్‌లో రిజిస్ట్రేషన్, లాగిన్, దరఖాస్తుల సమర్పణ వంటి సేవలకు ఆధార్ ధ్రువీకరణను వినియోగించుకోవచ్చు. దీనివల్ల ఆస్తుల వివరాలను డేటాబేస్‌తో అనుసంధానం చేయడం సులభతరం కానుంది. కేవలం వినియోగదారులకే కాకుండా, డైరెక్టరేట్ ఆఫ్ టౌన్ అండ్ కంట్రీ ప్లానింగ్ (డీటీసీపీ), గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) అధికారుల పరిపాలనాపరమైన లావాదేవీలకు కూడా ఆధార్ అథెంటికేషన్ వర్తించనుంది. దీనివల్ల రికార్డుల కచ్చితత్వం మెరుగుపడటంతో పాటు, మొత్తం ప్రక్రియలో జవాబుదారీతనం పెరుగుతుందని ప్రభుత్వం భావిస్తోంది.

కాగా, టీడీఆర్ ప్రక్రియలో ఆధార్ వినియోగాన్ని ప్రభుత్వం తప్పనిసరి చేయలేదు. ఇది పూర్తిగా స్వచ్ఛందమని ఉత్తర్వులలో స్పష్టం చేసింది. ఆధార్ కార్డుదారుల ముందస్తు అనుమతితోనే ఈ ప్రక్రియను పూర్తి చేయాల్సి ఉంటుంది. ఒకవేళ ఎవరైనా ఆధార్‌ను వినియోగించడానికి ఇష్టపడకపోయినా లేదా సాంకేతిక కారణాల వల్ల ఉపయోగించలేకపోయినా, వారికి ఎలాంటి సేవలను నిరాకరించబోమని ప్రభుత్వం వెల్లడించింది. అటువంటి సందర్భాల్లో పాస్‌పోర్ట్, ఓటర్ ఐడీ కార్డ్, డ్రైవింగ్ లైసెన్స్, పాన్ కార్డ్ లేదా ప్రభుత్వం జారీ చేసిన ఇతర ఫోటో గుర్తింపు కార్డులను ప్రత్యామ్నాయ ధ్రువీకరణ పత్రాలుగా సమర్పించవచ్చు.

ఆధార్ చట్టం, సంబంధిత నిబంధనలకు లోబడే ఈ నిర్ణయం తీసుకున్నట్లు పురపాలక శాఖ తెలిపింది. కేంద్ర ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖ, యూనిక్ ఐడెంటిఫికేషన్ అథారిటీ ఆఫ్ ఇండియాతో సంప్రదింపులు జరిపిన అనంతరం ఈ విధానానికి ఆమోదం తెలిపినట్లు ప్రభుత్వం పేర్కొంది.